“ലോകകപ്പിൽ വന്നത് കളിക്കാനാണ്, രാഷ്ട്രീയം പറയാനല്ല”- ജർമനിക്ക് മറുപടിയുമായി ഹസാർഡ്

ഖത്തർ ലോകകപ്പിലെ ആദ്യത്തെ മത്സരത്തിൽ തോൽവി വഴങ്ങിയ ജർമനി മത്സരത്തിന് മുൻപ് നടത്തിയ പ്രതിഷേധം ഏവരുടെയും ശ്രദ്ധ പിടിച്ചു പറ്റിയിരുന്നു. എൽജിബിടിക്യൂ സമൂഹത്തിനെതിരായ ഖത്തറിന്റെ നിലപാടുകളിൽ പ്രതിഷേധിച്ച് വൺ ലവ് ആംബാൻഡ്‌ ധരിക്കാൻ തീരുമാനിച്ച ജർമനിയെ ഫിഫ കടുത്ത ഭാഷയിൽ വിലക്കുകയായിരുന്നു. ഇതിൽ പ്രതിഷേധിച്ച് ടീം ഫോട്ടോക്ക് വായ പൊത്തിപ്പിടിച്ചാണ് ജർമൻ ടീം അണിനിരന്നത്.

ജർമനിയുടെ നിലപാട് ശരിയായ ഒന്നായിരുന്നില്ലെന്നാണ് ബെൽജിയത്തിന്റെ റയൽ മാഡ്രിഡ് സൂപ്പർതാരം ഈഡൻ ഹസാർഡ് പറയുന്നത്. അതിനു ശേഷം മത്സരത്തിൽ അവർ തോൽവി വഴങ്ങിയ കാര്യം ചൂണ്ടിക്കാട്ടിയ ഹസാർഡ് ടീമുകൾ ഇവിടെ വന്നിരിക്കുന്നത് കളിക്കാനാണെന്നും അല്ലാതെ രാഷ്ട്രീയം സംസാരിക്കാൻ വേണ്ടിയല്ലെന്നും വ്യക്തമാക്കി. ഫുട്ബോളിലാണ് ശ്രദ്ധ കേന്ദ്രീകരിക്കേണ്ടതെന്നും താരം പറഞ്ഞു.

വൺ ലവ് ആംബാൻഡ്‌ ധരിച്ചാൽ മത്സരത്തിന്റെ തുടക്കത്തിൽ തന്നെ മഞ്ഞക്കാർഡ് നൽകുമെന്നാണ് ഫിഫ വ്യക്തമാക്കിയത്. തനിക്ക് മത്സരം ഒരു മഞ്ഞക്കാർഡിൽ തുടങ്ങുന്നതിൽ യാതൊരു താൽപര്യമില്ലെന്നും അത് അലോസരമുണ്ടാക്കുന്ന കാര്യമാണെന്നും ഹസാർഡ് പറഞ്ഞു. എന്നാൽ ആ തീരുമാനത്തിൽ മാറ്റം വരികയാണെങ്കിൽ താനും ആ ആംബാൻഡ്‌ അണിയുമായിരുന്നുവെന്നും ഹസാർഡ് പറയുന്നു.